خرج الفنان المصرى الشهير محمد فؤاد عن صمته وهاجم الناقد الفني طارق الشناوي بعدما سخر من زيادة وزنه قبل جراحة التكميم التي أجراها مؤخرًا، إذ وصفه بأنه “سيد قشطة”، مشيرًا إلى أن الوصف خارج حدود اللياقة.
وقال فؤاد: “الوزن عقدة مش عارف اتخلص منها؛ لكن إيه العيب؟ يعني إيه سيد قشطة؟ دانا أسجنك لازم تبقي مؤدب أنت كدة مش متربي ولا شفت تربية أنا لا أجرؤ على أني أقول على حد كدة”.
وتابع: “أنا أطلع أقول عليه قرد مثلا؟ بتعلم جيل من وراك صحفيين إيه؟ لما قابلتله في السعودية مسكت نفسي كنا ضيوف في السعودية وجاي يسلم عليا هديله بالقلم يعني؟ بيقولي أنت زعلان؟ قلتله مش زعلان الجمهور زعل وأنا عمال أكظم غيظي عشان معملش مشكلة”.
واستطرد: “أنا نجم وغصب عنه مازلت نجم؛ لما عملنا “إسماعيلية رايح جاي” قال ده عامل زي ما يفرزه الطفل بعد ما يأكل بساعتين؛ مش فاهم أنت متعلم فين؛ أنا بجيب بس العقدة فين؛ كتب كدة وما شاء الله لا وقفت الجمهور عن مساندة الفيلم أو عن محمد فؤاد”.
واستكمل: “روحت فرنسا بيعرضوا الفيلم في المركز العربي؛ وروحت أسبوع بتذكرة غير الدعوة عشان أقعد حر نفسي صاحبي جاي بيقولي ده الشارع مقفول عشان الناس عايزة تتفرج على الفيلم؛ دخلت من ورا الناس ولقيتهم في الساحة اللي بره ناس قاعدة في الأرض”.
وواصل: “دخلت ولقيت الناس كلها واقفة بتصقفلي ولا كأني في كان؛ ولقيت بعد ما خلص الفيلم الصحفيين مقلوبين عليا والتاني بقي واقف وبينادي بيقولي محمد وعامل فيها صاحبي وأنا معرفوش وقلتله شوف ده ربنا شوفت أنت كتبت ايه؟ وانت معاك بقي ربنا يتولاك”.
واختتم محمد فؤاد حديثه قائلا: “إنسان غريب الشكل وأنا مش عارف أعمل ايه؛ أقابلك في السعودية أزعلك مني ويبقي شكلنا وحش قدام الناس ولا أعمل معاك إيه؟ احترم نفسك كفاية كدة؟ ده مصلحته إيه يكسر في تاريخ زي محمد فؤاد؟ أنا حزين أن دول بيكسروا في كل انسان اجتهد وهو مبيعجبوش إلا حاجات معينة وأي حد نضيف بيشوفه زي ما هو شاف”،
