سامح فايز متولي يكتب: مسلسل رأس الأفعى

الحلقة الأولى :
ظهرت نبرة في خطاب الإخوان ضد دراما رمضان اللي تناولت الجماعة، فيها نوع من السخرية.. مثلًا يقولك: المسلسلات اللي اتعملت عن الجماعة أكتر من الفترة اللي حكموها.. وده كلام مُضلِّل ومقصود، عشان يحوّل الموضوع لتريقة ويخلي الناس تتعامل معاه باستخفاف.. مع إن الإخوان قبل ما يحكموا مصر لمدة سنة، خططوا 90 سنة من أيام البنا للوصول للحظة اللي عمرهم ما حلموا بيها
.
لكن كل دراما الإرهاب والإخوان كوم، ومسلسل رأس الأفعى – من وجهة نظري – اللي اتعرضت حلقته الأولى امبارح ، كوم تاني.. مش تقليل من أعمال عظيمة فعلًا زي الاختيار أو هجمة مرتدة أو العائدون، لكن لأن رأس الأفعى هو العمل اللي هيفضح إجرام الإخوان في الفترة من 2013 ولحد القبض على محمود عزت، نائب المرشد للجماعة، في 2020.
.
إحنا قدام 30 حلقة أنا قادر أشوفهم حلقة حلقة حرفيًا، رغم إني ما قريتش السيناريو ومعرفش ولا واحد في فريق العمل.. لكني عشت الأحداث لايف لحظة بلحظة.. يعني في حلقة امبارح بنشوف الفنان شريف منير، اللي بيجسد شخصية محمود عزت، مسؤول النظام المسلح في الإخوان، والمعروف ظاهريًا بنائب المرشد، لما قابل عضو مكتب الإرشاد محمد كمال واداله ورقة فيها تعليمات، وقاله إن الورقة دي هتنقذ أموال الجماعة.. ده اللي كلنا شوفناه.. لكن اللي هتشوفوه في حلقة بكره وبعده وبعده، إن محمد كمال هيقابل باقي أعضاء التنظيم اللي منهم : عبد الرحمن البر، وعبد العظيم الشرقاوي، ومحمد منتصر، ويحيى موسى، وهيأسسوا مكتب لإدارة الجماعة بعد القبض على أغلب أعضاء مكتب الإرشاد.. مكتب منتخب هيبقى اسمه اللجنة الإدارية العليا، أو اللي هتتعرف باسم لجنة إدارة الأزمة.
وظيفة اللجنة دي ليها كذا شق.. أهمهم سرعة التصرف في أصول الجماعة وتسييل أموال الجماعة قبل التحفظ عليها من قبل الدولة، وتوزيعها على أعضاء الجماعة التنظيميين بنِسَب متفاوتة، لتعقيد عملية التتبع.. وهتتكتب شركات بأسماء شباب غير معروف انتماؤهم ظاهريًا للجماعة..
.
الجزء التاني: الإعداد لحرب مسلحة حرفيًا ضد الدولة.. ودي اللي هيحط خطتها محمد كمال بفتوى من عبد الرحمن البر.. فتوى مبنية على فقه اخترعه الإخوان اسمه “فقه الاغتيال”.. وده هنجيله بعدين.
في الحلقات اللي جاية هنشوف ونعرف أسرار ما كشفتهاش الدولة على مدار عشر سنين، مراعاة للأمن القومي.. مراعاة للناس البسيطة اللي ما كانوش هيقدروا يستوعبوا حجم الرعب اللي خططت له الجماعة.. رعب حتى بعض أفراد الجماعة نفسهم ما كانوش على علم بيه.. ودي آلية عمل التنظيم طول عمره..
عشان كده لما تقابل واحد إخواني ويحلف لك إن الجماعة ما قتلتش وما فجّرتش وما قتلتش، فهو مش بيكدب، لأنه فعلًا ممكن يكون ما يعرفش.. بس هو مش بريء لأنه نصر التنظيم وصدّقه على حساب بلده.. ومصدقش الدولة لما قالت له: ما تبقاش خروف في إيد كمال وعزت والمرشد وغيرهم
.
الحلقات الجاية هتكشف ظهور حركات زي حسم ، والعقاب الثوري ، ولواء الثورة ، وكتائب الشرعية، وكتائب حلوان، واللي كلها هي الأجنحة العسكرية للتنظيم.. هتكشف حقيقة العشرات من العبوات المفخخة اللي غرّقت شوارع مصر في فترة 2014 و2015..
في الفترة دي، إحنا كنا بنعرف خبر واحد عن عمليات الإخوان الإرهابية، وما بنعرفش عشرات الأخبار التانية.. ولو عرفنا، بتبقى أخبار سريعة.. زي خبر اغتيال محمد كمال.. أيوه، الراجل ده هيموت في نص المسلسل تقريبًا.. ما تقلقش، مش بحرق لك الأحداث.. هو قبل ما يموت هنعيش معاه أكشن “دلع”.. وكمان لحظة موته نفسها أكشن، هسيبها للمسلسل
.
الحلقة الأولى حرفيًا محتاجة كتاب لشرح كل تفصيلة فيها.. زي دخلة المسلسل، والفنان أحمد صيام وهو بيجسد شخصية سيد قطب.. و بيخطط لعمل انقلاب على الحكم (تنظيم 65) في دخلة طالب كلية الطب الشاب محمود عزت.. مشهد ما كملش دققتين، لكنه لخص الليلة كلها.. ده المشهد الأخطر في تاريخ الحركات الجهادية في العالم، مش في مصر بس.. واللي دارت أحداثه سنة 1965.. لما سيد قطب، مسؤول الدعوة في الجماعة، كان بيخطط لاغتيال عبد الناصر واغتيال شخصيات كبار رجال الدولة ، وحتى بعض الأدباء والمفكرين والفنانين ، وإغراق القاهرة بتفجير القناطر الخيرية..
وقبل ما حد يقول: بطل افترى، ده إحنا في شهر كريم.. فأقول له: بطل إنت تعيش خروف، وشوف الفيديو اللي اتعرضت فيه تسجيلات مرئية لأحد الشباب المشتركين في المخطط…. الفيديو حصلت عليه من مواقع الإخوان، مش من أمن الدولة في مصر.. يا خروف منك له!